العلاقه بين الانسان والمكان قديمه قدم الحياة نفسها وكمان بتشغل جزء كبير جدا من تفكيرى عشان كدا اهم مشاريع تصويرى بتهتم بالمكان والقسم دا موجود فيه صور لفنون العمازة المختلفة الموجودة فى مصر برؤيتى الخاصة ارجو انها تعجبكم
[ندعوك للتسجيل في المنتدى أو التعريف بنفسك لمعاينة هذه الصورة]
دى صور لمسجد ساريه الجبل(سليمان باشا) الموجود فى قلعه صلاح الدين بالقاهرة والمسجد دا بيعتبر اول مسجد اتبنى فى مصرعلى طراز المساجد العثمانيه ودا واضح اوى فى شكل المئذنة(رفيعة وطويله ومدببه عند القمة عامله زى القلم الرصاص)
[ندعوك للتسجيل في المنتدى أو التعريف بنفسك لمعاينة هذه الصورة]
دى فى جامع أحمد بن طولون
[ندعوك للتسجيل في المنتدى أو التعريف بنفسك لمعاينة هذه الصورة]
ودا بقى منظر خارجى لجامع السلطان حسن وكمان باين يمين الصورة جامع الرفاعى …. مسجد السلطان حسن دا أجمل بناء اسلامى فى العالم فعلا انا مشوفتش نسب متناسقة زى اللى موجودة فيه المسجد جميل جدا فعلا
[ندعوك للتسجيل في المنتدى أو التعريف بنفسك لمعاينة هذه الصورة]
ودا معبد ابو سمبل اجمل معابد رمسيس الثانى تخيلوا ان المبنى العملاق دا اتبنى من صخرة واحدة
[ندعوك للتسجيل في المنتدى أو التعريف بنفسك لمعاينة هذه الصورة]
ودى مسلات حتشبسوت الموجودة فى معبد الكرنك اللى على اليمين دى اطول مسلة فى مصر…حتشبسوت كانت عايزة تبنيهم من الدهب لكنها اكتفت بتغطية قممهم بالدهب واللى مش موجود الوقت طبعا تخيلوا روعة البناء ودقة التصميم وصموده عبر الزمن تعرفوا ان المسلتين دول اتعملوا من حجر اسوان واتنقلوا فى مراكب عشان يستقروا فى معبد الكرنك اعظم معبد فى العالم
[ندعوك للتسجيل في المنتدى أو التعريف بنفسك لمعاينة هذه الصورة]
ودى مئذنة جامع احمد بن طولون …..سلالم المئذنة دى من بره زى مانتوا شايفين ودى حاجة مميزة جدا للمئذنة لان مفيش فى العالم مآذن بالشكل دا غير اتنين مئذنه مسجد أبى دلف فى سامراء بالعراق والمئذنة دى
[ندعوك للتسجيل في المنتدى أو التعريف بنفسك لمعاينة هذه الصورة]
ودا مثال للبنيان فى العصر الحديث ……. بوابات السد العالى اكبر مشروع بنيه تحتيه فى العالم وقتها ……المشروع الضخم اللى كان رمز لصمود وشموخ وتحدى مصر وقتها واللى شاركت روسيا فى بنائه مع مصر ومش هينفع اقولكوا كم الفوايد اللى عادت على مصر من السد العالى لانها عايزه وقت طوييييييييل
[ندعوك للتسجيل في المنتدى أو التعريف بنفسك لمعاينة هذه الصورة]
ودى ميضأة ومئذنة جامع السلطان حسن
[ندعوك للتسجيل في المنتدى أو التعريف بنفسك لمعاينة هذه الصورة]
ودى قلعة واحد كان بانيها بالرمل على شط البحر عجبتنى اوى وكأنها حقيقية
[ندعوك للتسجيل في المنتدى أو التعريف بنفسك لمعاينة هذه الصورة]
وهذه صورة مش ممكن تلاقى زيها الا فى مصر المكان الوحيد اللى بتتقابل فيه الحضارات وتعيش مع بعض فى سلام وتآلف دى مئذنة مسجد ابو الحجاج اللى اتبنى فى عهد المماليك فوق معبد الاقصر اللى كان مغمور ومتغطى بطمى النيل وقتها وفضل المسجد من يوميها أثر فوق أثر … حضارة فوق حضارة المسلة والمئذنة مش بقولكم هى دى مصر